全九州之旅籌備篇 153


九州自駕遊行程

行程規畫

想遊九州多年,今次終於成行,在規畫行程時其實頗困難,坊間九州的旅行書不多,買了本閃令令九州書,都有少少參考價值,當然最重要的是找網上的旅行blog,可惜的是找了很久也找不到一個很合心水的照抄再改良,所以行程都是由各個blog中拼合的,希望我這個行程合你心意,可以參考。

Day 1  香港>福岡博多

Day 2  博多>豪斯登堡>原爆資料館>稻佐山看夜景

Day 3  長崎市>雲仙地獄>島原湧水群>熊本城>霧島

Day 4  霧島>高千穗牧場>霧島神宮>池田湖>長崎鼻>鹿兒島市

Day 5  鹿兒島市櫻島溶岩公園>湯之平展望所>有村溶岩展望所>鵜戶神宮>青島神社及鬼之洗濯板

Day 6  青島温泉>高千穗峽>白川水源

Day 7  草千里及火山博物館>阿蘇火山>阿蘇神社>大觀峯>九重夢大橋>湯布院

Day 8  湯布院行街>大分市睇夏祭花火

Day 9  大分市別府地獄>魚市魚座午飯>博多

Day10  福岡博多行街>香港

九州的地形比較難製訂路線,有幾個尖角,每個景點的相隔也頗遠,像第三日實在太趕了,而且阿蘇也很近,是否應玩埋阿蘇呢?到現在也不知怎行會順啲!

原本我的行程是倒轉走的,即去了別府那邊先,但後來想加入參加夏祭,找到8月4日大分有大型花火,多番考慮決定倒轉行,就可就到夏祭了。其實因為我要一早訂機票,想搭唯一的直航港龍早機,不用去東京或大阪再轉內陸機,但早定行程就很難找到花火的資料,上次去小樽潮祭和今次都一樣,我是參考這個網站全國花火大會,記住那時是沒有2013年的資料,我是根據去年差不多時間和行程附近地方有沒有合適的花火大會,如今次的大分市,再去大分市的網頁看看有沒有落實來年花火大會的日期,左查右查靠漢字去搵,才找到資料的。

計車程我是用日本google map,以往經驗用google map計出來的時間都預得頗輕鬆,但今次發現預得好準,行錯下路便有點趕了,而且google的路線很update,反而車上的GPS有些新路沒記錄,造成混亂,對預時間都有影響。

旅館方面,很多人住的東橫inn我沒住過,除了在香港訂套票包的兩晚博多酒店外,我全都是在樂天網找的,好方便。只有住大分的一晚選擇很少而且都幾貴,不知是否同夏祭有關,我在樂天以外都找了一下,但依然找不到,只好訂了一間素泊都要¥6,825一人的酒店,但因為早訂,之後樂天推出了一些優惠,我都收到資料,後來這間有優惠價¥5,000一人,還可用coupon減¥1,000,足足慳了¥5,475,正!其他有兩間都用了coupon減¥1,000,有時宣傳電郵都幾有用!

租車

我一向都是在Toyota rent a car網頁租車,租金雖較貴,但方便和穩陣,以往我們都是租P2級的車,揸過bB、Ractis、Porte,今次覺得還是揸這些很悶,於是花多少少錢租混能車Prius,上代Prius同平版混能Aqua(即香港的Prius C)同價,8日租金比租P2級的車貴不足¥10,000,連慳返的油費應貴不了多少,又好玩啲有力啲。事實上我們今次連最後打爆油缸還車都只是入了兩次油,共花了¥11,717,保守估計起碼慳了¥7,000,玩得過!

稻佐山Prius

第一次揸混燃車,真係好靜同夠力。

繼上次北海道GPS失靈,今次的問題除仍有些景點入電話找不到外,最大問題是不夠update。前者其實我們也有責任,找電話不夠仔細,上次叫人搵定MapCode,自己又唔做足,電話不靈時才上網,偏偏九州很多地方上網很慢,做成混亂,自己抵打!但後者問題嚴重得多!

記得上次去北海道,租車時櫃枱小姐有問我們會去那處,指出某些路段有新路,提醒我們到時要看路牌。不知是否上次是在機場租,遊客多,今次在博多駅租,甚麼也沒說,我們由青島一帶去高千穗峽時,明顯道路同GPS指示不同,幸好我們上了新路,憑方向看應走啱路,GPS卻顯示我們在路間飛,好搞嘢,見到條路新到發光咁,明白是GPS的問題。回來查了一下,應該是去年12月新開通的高鍋至都農一段東九州自動車道。老實講,真的幾大鑊,幸好我們走對路,其後有幾次都覺得GPS的指示不清晰,分叉路不知怎行,自然會懷疑又是GPS的錯。

同埋今次上車校好GPS後,其預估時間同我們在google得出的相差頗大,但行完又差不多,即係google估的時間相當切合現實(包括超速!),又或者google有新路,總之車程要預番鬆少少。

找MapCode的方法,我一般是用景點名+MapCode直接search,但最近找到一個網goo旅行,入景點名便會有詳細資料,包括MapCode,相當方便。另一個找MapCode的網是Mapion,將地址copy落檢索欄就會出地圖,看過正確就可點右上方的「地圖URL」,便可找到MapCode。這兩個網站都是寫blog時才找到的,剛才試了一下有村溶岩展望所,竟然找出來的MapCode是不同的!試一下找豪斯登堡又很相近,因為不能入落GPS試,大家請自行決定怎做,或許帶定兩組去試,有結果不妨告訴我。

通訊

呢幾次去日本,張b-moblle上網卡變完又變,最先要搵當地手機開通,後來唔使,今次已有專門給遊客的,只可用14日,¥3,980慢速3G,即係香港$68一個月任上網那種,其實一般都夠用,不過比以前¥2,980用一個月貴了又少了日數!好彩日圓跌了,之前約$300,今次都係三百二左右。張卡要上b-mobile網訂,叫visitor sim,網頁是英文的,好容易訂到,留意一定要早幾日訂先可送到酒店。

每次去日本,上網總是有點阻滯,因為我們有隻pocket WiFi,所以一般都是訂大SIM卡,用pocket WiFi share出來大家用,只要帶夠尿袋(後備電)就好方便。現今部部手機都可做hotspot,其實用手機都得,今次唔知做乜我決定訂nanoSIM,再帶卡套,咁三部手機同隻pocket WiFi都用得。幸好如此,隻pocket WiFi第二天便死了,應是嚿電打柴,跟住用老公部sony Xperia Z,但一時間無setting在手,要上b-moblle網找,但無上網又點上網?幸好在稻佐山等睇夜景時,一search發現其食店有免費WiFi,咁先搞掂。其間又想換落iPhone度,但無帶拮針!呢個故事教訓我地,應有多手準備,訂細SIM係啱,但既然用iPhone,唔該帶針或萬字夾!

稻佐山b-mobile

等看夜景時,竟有免費WiFi,連忙急救網絡,看,多大陣仗!



歡迎留言

This site uses Akismet to reduce spam. Learn how your comment data is processed.

153 thoughts on “全九州之旅籌備篇

  • Yao

    你好!

    我再規劃過行程請幫手睇睇咁行順唔順,thanks!
    Day 1 香港>福岡>坐火車約1個半小時)約7:00到達鹿兒島,住鹿兒島
    Day 2 取車遊鹿兒島>櫻島火山>住霧島
    Day 3霧島>熊本城>住熊本
    Day 4熊本>阿蘇火山>阿蘇神社>大觀峯>住別府地獄
    (本想去高千穗峽,但怕太趕,又唔想揸太耐車程)
    Day 5別府地獄>湯布院行街>豪斯登堡>住豪斯登堡
    Day 6玩豪斯登堡>博多>住博多
    Day 7 博多>柳川>能古島>住博多
    Day 8 博多行街>還車>香港

    因為唔想太趕,同揸車車程行耐,請問咁行係咪順?中間有咩景點好玩值得去呀?唔該哂!1

    View Comment
    • dollergy

      大致上應該無問題,只係阿蘇山怕唔夠時間玩,主要係唔知上唔上到山,如果以上山為主要目的,可能要預後面有些地方去不到。
      Day4如果行唔到別府地獄,day5要玩地獄又要行湯布院,恐怕又是不太夠時間,應該去到豪斯登堡都天黑,不過住一晚好似夜晚都幾靚。
      霧和熊本我沒多玩,霧島我去過的地方都麻麻,熊本城都值得一去,但熊本還有甚麼地方可玩,不大清楚,可考慮這晚入阿蘇,住那裡的特式旅館,如我住過那間小木屋之類,那day4會鬆動啲。
      豪斯登堡我自己普通,不過住入去感覺可能又唔同。

      View Comment
      • Yao

        多謝回覆!
        day 4我諗住都要5-6點先到別府住,day5早上先去行地獄,食完午餐去湯布院行街,預算6點到豪斯登堡,day6先玩豪斯登堡,day3本想行完熊本去湯布院,住湯布院,不過我老公好怕住咁多日温泉酒店,佢喜歡夜晚有街行吓,住霧島主要因為我諗住day2玩鹿兒島玩完都晏,所以近近地住霧島,我有諗過day3呢日去高千穗峽,再去熊本不過又好似好唔順路同埋都比較揸得耐車,我諗要做下取捨先得

        View Comment
        • dollergy

          唯一問題係湯布院應該唔夠時間行,6點到豪斯登堡,即4點出發,午飯後才到湯布院,即約只有三小時,相信你之後會心掛掛要再去多次。
          高千穗忘記它吧,下次去宮崎日南海岸一帶才去吧!

          View Comment
          • dollergy

            如果咁呢
            Day 1 香港>福岡>坐火車約1個半小時)約7:00到達鹿兒島,住鹿兒島
            Day 2 取車遊鹿兒島>櫻島火山>住霧島
            Day 3霧島>日南海岸一帶,即青島神社,鬼之洗濯皮,鵜戶神宮等,車程2個鐘,住日南海岸
            Day 4日南海岸>高千穗峽>阿蘇>住阿蘇
            Day 5阿蘇火山>阿蘇神社>大觀峯>住湯布院
            Day 6玩湯布院>別府>住博多(博多夜啲返去都無問題)
            Day 7 博多>柳川>能古島>住博多
            Day 8 博多行街>還車>香港

            咁會無咗熊本,但就有你想去嘅高千穗峽同我最愛嘅日南一帶。

            View Comment
  • suki

    你好,師姐,26/5-31/5出發,5個大人,想自駕遊,經鹿兒島機場,第一日到埗已經係4點幾,最後一日 要2:30到機場,依家都未諗好個行程,想主要玩鹿兒島個邊,會去霧島,指宿同櫻島,但都想去高千穗河源,阿蘇火山同烏栖outlet

    View Comment
    • dollergy

      你這個行程的確不好編,粗略弄一弄,而且就快出發了,可能預訂酒店會不太順利。
      26/5 到鹿兒島機場租車直去霧(約半小時)住一晚
      27/5 玩霧島一帶(我覺得不是太多地方好玩),然後去阿蘇山一帶(約三個鐘),看可否上山,住阿蘇
      28/5 再玩阿蘇一帶,然後去高千穗峽(個零鐘),住這處
      29/5 直踩櫻島(約4小時),住櫻島或鹿兒島市
      30/5 去指宿(約2小時),住指宿
      31/5 返機場回港

      有些車程都幾長,不是一個好行程,鳥栖實在放不下,或許你精細玩鹿兒島一帶,又或是放棄高千穗,玩熊本都會好啲。

      View Comment
  • KT

    Hello, 你既資料實在幫了好多人, 我第一次去九州, 全程自駕, 只有8日7夜, 以下2個行程邊個會好D??
    因為買package , 所以一定要連住2 晚博多。(長崎, 雲仙) 同(霧島) 只可以2選一, 希望如果以自然景色為主
    先行謝謝!

    Option 1:
    Day 1 福岡 –>佐賀 (1 hrs drive)
    Day 2 佐賀 –> 長崎 (1 hrs)
    Day 3 長崎 (1.5 hrs drive)–> 雲仙地獄(2 hrs drive) >熊本城
    Day 4 熊本城(1.5 hrs) –> 阿蘇
    Day5 阿蘇(1 hrs 45 mins) –>九重夢大橋 –>(45 mins)湯布院
    Day 6 湯布院行街 (40 mins drive) >別府地獄>(1 hrs 45 mins)博多
    Day 7 博多
    Day 8 博多

    Option 2:
    Day 1 福岡 –>(1 hrs 45 mins) 熊本城
    Day 2 熊本城 –>(2 hrs 15 mins) 霧島
    Day 3 霧島 —>(1 hrs 45 mins) 宮崎
    Day 4 宮崎 — >(3 hrs) 阿蘇
    Day5 阿蘇(1 hrs 45 mins) –>九重夢大橋 –>(45 mins)湯布院
    Day 6 湯布院行街 (40 mins drive) >別府地獄>(1 hrs 45 mins)博多
    Day 7 博多
    Day 8 博多

    View Comment
    • dollergy

      多謝你的支持,看過你兩個行程,要取捨的都是我很喜歡的地方,好難決擇啊!

      先說Option 1,佐賀我只玩了豪斯登堡,可有可無,長崎我玩的只有原爆館較可觀,好玩的是去熊本路上的雲仙地獄和島原湧水,看你的行程像走陸路,要搭船啊,又是一個很有趣的體驗。
      Option 2則是霧島,霧島我玩的景點都可有可無,旅館就相當不俗,但宮崎海岸則是我最愛之地,鬼之洗濯板和青島神社真是一絕!由宮崎去阿蘇不去高千穗峽嗎,那處很不錯,又是你喜歡的自然景色。

      要選的話,可能Option 2較合你大自然景色的要求。

      View Comment
      • KT

        謝謝你^^, 我應該選宮崎, 放棄長崎,
        我將會5月尾去, 但我想問我第一日落機係4 點左右, 之後機場取車, 揸去態本, 傍晚道路OK ma?
        聽你講完, 我想放款霧島, 由熊本城直去宮崎。以下行程順路嗎?
        即係住2 晚青島温泉, 定係順住路住一晚霧島?

        Day 1 福岡 –>(1 hrs 45 mins) 熊本城
        Day 2 熊本城 –>(2 hrs 30 mins) 宮崎
        Day 3 宮崎 — 青島温泉
        日南鵜戶神宮>青島神社及鬼之洗濯板
        Day 4 宮崎 — >(3 hrs) 阿蘇
        青島温泉>高千穗峽>白川水源>阿蘇
        Day5 阿蘇(1 hrs 45 mins) –>九重夢大橋 –>(45 mins)湯布院
        草千里及火山博物館>阿蘇火山>阿蘇神社>大觀峯>九重夢大橋>湯布院
        Day 6 湯布院行街 (40 mins drive) >別府地獄>(1 hrs 45 mins)博多
        Day 7 博多
        Day 8 博多

        View Comment
        • dollergy

          其實你可以考慮第三天住鹿兒島,順便玩埋櫻島,即
          Day 1 福岡 –>(1 hrs 45 mins) 熊本城
          Day 2 熊本城 –>(2 hrs 35 mins)鹿兒島
          先玩熊本附近,因早一晚可能無時間玩,再找找沿途有甚麼好停留,夜晚去鹿兒島市的屋台搵食。
          Day 3 鹿兒島 –> 青島温泉
          櫻島>鵜戶神宮>青島神社及鬼之洗濯板
          跟住就一樣。
          櫻島都好好玩㗎,我行程的第5日就是如此走,最好玩是這一天。

          View Comment
    • dollergy

      見到有予約,咪入去囉,最直接選第一個橙色有架車嗰個,入去佢叫你選邊間舖借、還,再選日期、車種等,應該唔難呀。
      或者可用這個中文網,大致相同,價錢都好似一樣,但有時車種選擇較少。

      View Comment
  • Yao

    你的資料很實用,想請問我會七月尾去八日自駕,唔想太趕應該去唔到鹿兒島同宮崎,想去佐賀,熊本,阿蘇,別府,大分路線點行會好點?謝謝

    View Comment
    • dollergy

      其實8日時間都唔少啊,我覺得你鹿兒島或宮崎選一邊去都可以,如果以我的行程稍改一下,可考慮如此走:
      Day 1 香港>福岡博多
      Day 2 博多>豪斯登堡(可以不去,改去網友推介的佐賀三瀨牧場>原爆資料館>稻佐山看夜景
      Day 3 長崎市>雲仙地獄>島原湧水群>熊本城>霧島
      Day 4 霧島>霧島神宮>鵜戶神宮>青島神社及鬼之洗濯板
      Day 5 青島温泉>高千穗峽>白川水源
      Day 6 草千里及火山博物館>阿蘇火山>阿蘇神社>大觀峯>湯布院
      Day 7 湯布院行街>別府地獄>博多
      Day 8 福岡博多行街>香港

      View Comment
          • Yao

            多謝回覆!請問以下行程如何:
            Day 1 香港>福岡博多
            Day 2 博多>豪斯登堡>住豪斯登堡
            Day 3 長崎市>雲仙地獄>島原湧水群>熊本城>住霧島
            Day 4 霧島>鹿兒島>櫻島火山>住鹿兒島
            Day 5 鹿兒島>高千穗峽>白川水源>阿蘇>住阿蘇
            Day 6 草千里及火山博物館>阿蘇火山>阿蘇神社>大觀峯>住湯布院
            Day 7 湯布院行街>別府地獄>博多
            Day 8 福岡博多行街>香港
            我有車牌不過比較小揸車,通常老公揸,所以盡量希望車程在兩個鐘內,請問如果好似以上行程可以嗎?

            View Comment
          • dollergy

            如果你Day2住豪斯登堡,day3由豪斯登堡出發去長崎再玩落去會太趕,可放棄長崎,由豪斯登堡直接去雲仙地獄,車程約兩小時。
            最大問題是day5,由鹿兒島去高千穗峽好遠,車程3個半鐘,比較辛苦。
            想知車程多少,只要在google map入兩個景點名選車仔圖案就可以了,這是規劃自駕遊不可或缺的功課,而者在地圖找出景點,知道大概在那裡,你會較易掌握應該點行才順路。

            View Comment
  • Elise

    HI 你好
    我打算今個暑假一家五口到九州,因小孩太小,不能分房睡,在book房輸入2大3小,一來選擇不多,二來太貴了,細看酒店細則,說不加床,有小孩附加費,可否book二大人,到check in 時才給附加費?

    View Comment
    • dollergy

      你另一個留言已覆了,再嘗試多給一些意見,其實現在book房,可能有些旅館未接受預訂,有機會只可3個月前book。如果你有心水酒店,而佢已接受預訂,又沒有適合你的房間,如你所說有相關的酒店細則,你可試試email問一下對方,告訴對方你的需要,不過用英文問的話,可能要等一下或追多幾次,對方先會回覆。
      另外你是用那一個方法找旅館呢?我用我用開的樂天網試search一下,人數輸入2大人,小人可選一個高年級,2個幼兒包食包床,可能會有較多選項出現,我試了阿蘇一帶七月尾的,選擇不少啊,有些不錯的旅館三萬多yen已一泊二食,二萬yen樓下也有。

      View Comment
      • Elise

        謝謝您的回答,真是大好人,我想我在計劃行程時會有更多的問題出現,希望您不會嫌我煩。
        看您的資料,真的很有用呢!

        View Comment
        • dollergy

          剛才回覆的有小小錯漏,樂天網幼兒有四個選項,有關食(食事)和床舖(布団),分別是兩樣都有,有食或有床舖,兩樣都無,我之前寫了飯團,是錯的。

          View Comment
          • dollergy

            要入會的,我記得那時都有點麻煩,不過用英文填都OK,肯定沒有入日文,因為我不會嘛。有不明白的地方,copy去翻譯網站弄明白就可以了,樂天選擇會多一點,我見有些旅館在hotel.com之類也有,但晚餐和房間種類都較少。

            View Comment
          • dollergy

            可以的話我是選到時才付款,試過無得揀用信用卡畀了,後來又改變計劃要取消,其實都輕易攞返錢,不過免得過都是現場付方便啲。

            View Comment
          • Elise

            多謝您呀!我已成功訂了2間酒店,每間4晚,價錢係暑假來說,算好平了!真的多謝您比嘅資料,好有用!
            我第一次自己睇哂資料plan行程,過程學到好多野,未出發已好開心!
            再次多謝您

            View Comment
          • Elise

            是每間2晚才對!嘻嘻!以下是我訂的簡單行程,希望你比下意見。
            第一日:福崗機場,取車入佐賀,住佐賀http://hotel.travel.rakuten.co.jp/hinfo/67850/?f_teikei=iphoneday
            第二日:遊佐賀/長崎 住佐賀
            第三日:佐賀-》柳川->熊本 住阿蘇農莊
            第四日:玩阿蘇農莊內各設施。住阿蘇農莊
            第五日:阿蘇->大分久住花園-》湯布院。住別府 悠彩之宿
            第六日:九州動物公園-》別府溫泉 住悠彩
            第七日:遊Sanrio Land-》福崗。住福崗 http://travel.rakuten.co.jp/HOTEL/70206/70206.html
            第八日:遊福崗,住同上
            第九日:shopping-》 回港

            View Comment
          • dollergy

            每個地方住兩晚,對你們二大三小的組合來說,絕對是聰明之做法,不過你遊玩的地方,我大多沒去過,好難畀意見,看來頗適合小朋友,你只要記住千萬不要貪心趕行程便可以了。
            其實自己plan行程真的好好玩,選旅館選食甚麼已開心一次,到時親身經歷又是另一種體會,即使遇到意外要即時想辦法應變,回來後也會變成特別的回憶,同跟團遊魂咁好唔同,去過邊都唔多記得。
            我還會回來事後旅行一番,就是寫這個blog,記憶和感受更深!

            View Comment
    • dollergy

      我的blog在文章中會有相關資料的link,其中一個「快船」二字便可連去船公司,不過我再看時都發覺那個link實在太不起眼,對不起啊!文章旁邊或最底(看你的電腦屏幕有多大)會有一欄有用資料,文中所有link都會列出來。
      你那個網是長崎去熊本,我是由島原去熊本,有點不同,快慢船分別由兩間船公司經營:
      快船熊本フェリー株式会社
      慢船九商フェリー株式会社
      快者半個鐘,慢者一個鐘。

      View Comment